ქართულ პოლიტიკას მილიონერი დეპუტატების ნაკლებობა არ აქვს. პირიქით, ვინც ქვეყანაში ერთი მილიონი მაინც იშოვა, თითქმის ყველა პოლიტიკაში წავიდა ან სხვადასხვა აქტივობით მონაწილეობენ პოლიტიკურ ცხოვრებაში. მილიონერ ქმრებს ყველა იცნობს, ცოლებს ნაკლებად. თუმცა ეს ყველა პოლიტიკოსზე არ ვრცელდება, ზოგიერთი მათგანი აქტიური საზოგადოებრივი ცხოვრებითაც გამოირჩევა, მაგრამ ძირითადად პოლიტიკოსების ცოლები თავს არიდებენ მედიასთან ურთიერთობას…
წარმოგიდგენთ მილიონერი პოლიტიკოსების ცოლებს, მათ ყოველდდღიურ ცხოვრებას და საინტერესო დეტალებს ყოველდღიურ საქმიანობაზე…
ბექა ოდიშარიას მეუღლე მეუღლე მაკუნა გამცემლიძე
მე-10 მოწვევის პარლამენტის დეპუტატის, “ქართული ოცნება – დემოკრატიული საქართველოს” წარმომადგენლის ბექა ოდიშარიას მეუღლეს – მაკუნა (მარიამ) გამცემლიძეს საზოგადოება კარგად იცნობს. მაკუნა ერთ-ერთ სამშენებლო კომპანიაში პიარისა და მარკეტინგის დეპარტამენტს ხელმძღვანელობს. მეგობრობს ცნობილ სახეებთან, კარგად მღერის და ტელეგადაცემების ხშირი და სასურველი სტუმარია.
წყვილს 22-წლიანი ქორწინება და სამი შვილი აკავშირებთ.
ლევან კობიაშვილის მეუღლე თამარ წულეისკირი
ფეხბურთის ფედერაციის პრეზიდენტის ლევან კობიაშვილის მეუღლე თამარ წულეისკირია, რომელიც სხვა ფეხბურთელების ცოლებისგან განსხვავებით, მედიაში თითქმის არასოდეს ჩნდება. წყვილს 23 წელია ოჯახი აქვს და ორი შვილი – 23 წლის ნიკა და 15 წლის სალომე კობიაშვილები ჰყავთ, რომლებიც ფრაიბურგში დაიბადნენ, როცა კობი გერმანიაში თამაშობდა და მისი ოჯახიც იქ ცხოვრობდა.
ელგუჯა გოცირიძის მეუღლე რუსუდან ავალიანი
ელგუჯა გოცირიძის ქონება გასული წლის მონაცემებით 6 000 000 ლარს შეადგენს. დეპუტატს ჰყავს მეუღლე რუსუდან ავალიანი, რომელიც ექიმია. ასევე სამედიცინო სფეროში მუშაობს მისი ქალიშვილი – ქეთი გოცირიძე ჩაჩავას კლინიკაში რეპროდუქტოლოგია. დეპუტატს ბინების დიდი ნაწილი ცოლის სახელზე აქვს რეგისტრირებული – რუსუდან ავალიანის სახელზეა 95 000 დოლარად შეძენილი საცხოვრებელი ფართი იტალიურ ეზოში, ღამბაშიძის ქუჩაზე, ასევე ბინა დედაქალაქში ონიაშვილის ქუჩაზე, რომელიც 80000 დოლარად შეიძინა, ასევე მიწის ნაკვეთი წავკისში, რამდენიმე არასაცხოვრებელი ფართი თბილისში და ავტოფარეხები.
მამუკა ხაზარაძის მეუღლე ირინა ხიდაშელი
პოლიტიკური კარიერისგან განსხვავებით, მისი პირადი ცხოვრება მშვიდია. წლებია მისი მეუღლე კლასელი ირინა ხიდაშელია. „პალიტრავიდეოსთვის“ რამდენიმე წლის წინ მიცემულ ინტერვიუში ამბობდა, რომ მეუღლესთან კამათიც კი არასოდეს მოსვლია. 90-იანებში მის ოჯახსაც ძალიან უჭირდა და უშუქობა და საკვების არქონა არც მისი ოჯახისთვის იყო უცხო, თუმცა ამ დროს ირინა სახლში ეგულებოდა… წყვილს ხუთი შვილი ჰყავთ, ირინა ხიდაშელი დიასახლისია.
გიორგი გახარიას მეუღლე მარიკა ფანცულაია
გიორგი გახარიას მეუღლე 1983 წლის 10 აპრილს დაბადებული მარიკა ფანცულაიაა. წყვილს ერთი გოგონა, ანნა ჰყავს. მარიკა ფანცულაია პროფესიით ექიმ-ბაქტერიოლოგია და “ავერსის” ცენტრალურ ფილიალში მუშაობს…
ავთანდილ ენუქიძის მეუღლე თამთა ღლონტი
პარლამენტის წევრს, ვიცე-სპიკერს ავთანდილ ენუქიძეს რამდენიმე თვის წინ, 67 წლის ასაკში ვაჟი შეეძინა. ავთანდილ ენუქიძე 35 წლით უმცროს თამთა ღლონტზეა დაქორწინებული. მათ ასევე ჰყავთ გოგონა, სოფია ენუქიძე, რომელიც 2019 წელს საფრანგეთში დაიბადა და გიორგი კეკელიძე (ავთანდილ ენუქიძის გერი). თამთა ღლონტი პარლამენტში დეპუტატის თანაშემწედ მუშაობს, ასევე არის საქართველოს ტექნიკური უნივერსიტეტის ლექტორი.
კობა ნაყოფიას მეუღლე გვანცა ბიწკინაშვილი
პოლიტიკოს კობა ნაყოფიას მეორე მეუღლე საზოგადოებაში მასთან ერთად არასოდეს ჩნდება. წყვილის ქორწინება მედიისთვის ჯერ კიდევ წლების წინ სკანდალური აღმოჩნდა, რადგან მათ შორის 20-წლიანი სხვაობაა და მასთან ნაყოფიამ პირველ მეუღლე ელგა სოფიასთან განქორწინების შემდეგ შექმნა ოჯახი. ქალი არასამთავრობო ორგანიზაცია UNDP-ს გუნდში ადმინისტრაციისა და ფინანსების ასისტენტად მუშაობს. წყვილს ერთი საერთო შვილი ჰყავთ.
