ცნობილია 20 წლის ბიჭის, თამაზ მთივლიშვილის სასტიკი მკვლელობის საქმეზე ბრალდებული 5 პირის ვინაობა.
თბილისის საქალაქო სასამართლომ უკვე იმსჯელა მთივლიშვილის საქმეზე დაკავებული პირებისთვის აღმკვეთი ღონისძიების შეფარდების საკითხზე და საქმის ფიგურანტებს მოსამართლემ წინასწარი პატიმრობა შეუფარდა.
სამართალდამცავებმა მკვლელობის საქმეზე ბრალი 5 პირს წაუყენეს, მათგან ორი პირი ძებნაშია, ამიტომ გიორგი პაპაშვილსა და ბაირამ ალი გუსეინოვს აღკვეთის ღონისძიების სახით პატიმრობა დაუსწრებლად შეეფარდათ.
გიორგი პაპაშვილს პროკურატურა განსაკუთრებული სისასტიკით ჩადენილ მკვლელობას ედავება, დანარჩენებს დანაშაულის შეუტყობინებლობის ბრალდებით აქვთ ბრალი წარდგენილი. ამ ბრალდებით არიან დაკავებულები ვერიკო კაპანაძე, ლუკა გვენეტაძე და საბა რობაქიძე, მათ სასამართლომ ორთვიანი წინასწარი პატიმრობა უკვე შეუფარდა. დაკავებულები საქმის მთავარ ფიგურანტად გიორგი პაპაშვილს ასახელებენ.
შეგახსენებთ, თამაზ მთივლიშვილი ორთაჭალაში გიორგი პაპაშვილის ბინაში სადისტურად მოკლეს.
20 თებერვალს ბინაში მისულ პაპაშვილის დედას სახლში ცხედარი დახვდა, სწორედ მან დარეკა 112-ში და აცნობა ძალოვნებს, რომ მის სახლში ახალგაზრდა ბიჭის ცხედარი იყო.
